من إبداعات الشاعرة الراقية / أمنية السيد

لو عاوز شيء بشده
اياك تطلق سراحه
فيه حاجات ياما بغبائنا
قولنا نسيبهم فـ راحوا
بستغرب ع اللي جرّب
واللي مارضيش يقرّب
طب فيه عصفور بيهرب
يرجع ويخون براحه !!

انا عمري مابرمي حاجة
والقاها ف خط سيري
وعمر ما جاتلي حاجة
الا اللي رماها غيري

لو عاوز شيء بشده
اعمل حواليه قوسين
خلي عيونك تحاوطه
لو حتى يروح لفين
خليك فاهم ياصاحبي
الحلو بييجي مرة
ومافيش ف الدنيا فرصة
تتكرر مرتين .