من إبداعات الأديبة والشاعرة المتألقة / نجوى محمد

سيب الأيام والمواقف تِرتبلك الناس ال حَواليك ..
ماتفتحش الأبواب اللي اتقفلت ..
ماتجريش ورا اللي سابك .. "هتندم لو رجعت"
ماتبصش من ورا شباك ذكـرياتك عليهم .. "انسـاهُم"
خلي ليك وقت ماتعملش فِ حاجه غير انك تِرتب الأماكن .. "الأماكن الفاضيه سيبها فاضية عشان هييجي ال يِملاها ويبقي يستاهل"
بلاش تعيد نفس الأخطاء عشان النهايات كده عُمرها ما هتتفير ..
بلاش تبقي رَد فعل علطول ..
جرّب تبقي فعل .. "هتتغير حياتك "
بلاش تمارس دور المُضحي .. "ع فكرة أنتَ أول واحد هيضحوا بيه"
بلاش تِجلد فِ نفسك .. "احنا أصلاً بنِغلط عشان نتعلم "
اعمل لنفسك حياة جُوه حياتك، ومساحه بتاعتك ،ومسافه بينك وبين الناس .. "لو معملتش كده هياكلوك حيّ"
إسعد نفسك .. إسعد نفسك .. إسعد نفسك ..
إسعد حَد طيّب و بلاش تِسعد حَد بينكر الجميل .. "هتدخل في حاله نفسيه ، و هتكره طيبتك"
إعمل الصَح دايماً بصرف النظر غيرك بيعمل ايه ..
حِب نفسك .. حِب نفسك .. حِب نفسك ..
إتعود تدي فرصه واتنين .. بس التالته فارِق واقفل ورّاك الباب .. "ماتنساش تحط قفل ع الباب،دول أوغـاد ،وممكن يدخلولك يبوظوا حياتك "
لو غِلط اعتذر .. "ماتبقاش قليل الأدب والذوق"
عامل ربنا فِ الناس عموماً ..
ماتفتكرش لغيرك حاجه وِحشه، واستمتع بِفكرة خروجه مِن حياتك .. "ده لوحده مَكسب كبير "
الناس بتحترم اللي بيحترم نفسه مش العكس .. "اوعي تهين نفسك أبداً"
خِف حِملك دايماً، و فرّح حد مستني الفرحـة .. "جبر الخاطر مش بفلوس والطيبات لله"
حِب أهلك .. حِب أهلك .. حِب أهلك ..
الدنيا مش بتدي للـي عاوز ياخد .. بتدي للـي قادر ياخد ويقولها أنا اهوه .. "عبد الغفور البرعي قال كده لابنه "

استمتع بأقل الحاجات .. "الفرحة مش صعبه"
نجوي محمد