ليه
ليه البدايات بتكون باهرة ؟؟
بحنين وشوق في عيون ساهرة
مش شايفة غير أحلى شياكة
وتقول وتحكي وتتحاكي
وبعد كل دا ... إيه يجري
نُقف لبعضنا عالواحدة
بعد أما كنا بروح واحدة
نمسك في فتافيت الهفوات
نعند. ونتصيد غلطات
وبعد كدا........ نشكي الوحدة !!!!
ليه نجرح بعضنا ونشاكل ؟
ولا يكون فيه بينا مشاكل ؟
وإيه يحصل طيب لو عشنا
في أمل وحياة فيها تفاؤل !!
بود ممزوج بالإحسان
والإحترام وياه طيبة
بيعرف يعني ايه انسان
ويحسه من نظرة قريبة
ويشوفه من كل زوايا
مش فحص أخطاء ومزايا !!
مش بس ساعتها هانتآلف
هانعيش بالحب ونتكاتف
وحياتنا تكون زى البدايات
والعمر دا كله يكون.....بدايات
أسماء عبد الله
ليست هناك تعليقات:
إرسال تعليق