شكراً حبيبي : (زجل) بقلم الشاعره / فردوس النجار

شكراً حبيبي : (زجل)

لَوْلا حبيبي..
اللي قَطَف ورد العمر..
ماكان في نيسان..
بيفرفط زهر..
ولا كان في بـِ الكَون..
ضحكة مزَوزَقَة..
بتلِمّ غَيم مْشَرَّد ..
وينزل قَطِر
وتشِيل شَوك..
مْكَحَّل بنَابَين..
تـَ الصيف..
يتغاوى..
بعناقيد التمر

وُلَا كانت الرهبان..
شَكِّت مَسبَحة..
وُلا تَمتَمِت آيات..
عا قَدَّ الصُّوَر
ولا كان سِرّ الليل..
بيقلبي غفي..
ولا كانت النجمات..
تترَصَّد قمر

لَوْلا حبيبي..
شو نفع (النهار) ؟
العايم على..
صدر الشمس دَوَّار
يتخمَّر بـْـ ريق الشفق..
تحت العتم..
والبحر يتعَلَّق..
على الزنار!

لَوْلا حبيبي..
ما رجع أيلول
ولا حْمِلت مَغزَل..
أو عَقَصْت النول
ولا لـْبِسْت هالكنزةِ..
اللي بترَشرِش ضِيَا
ولا كان رغم الضيم..
في قصة فرح..
ولا كانت الدنيا..
فجر مَبلول
ولا كان مَرَّة..
هالقهر مَغلول

لولا حبيبي..
مين بالميدان؟
مين اللي شرقط نور..
عطراف الحكي؟
وخَلَّا النهر..
يسرَح ولو عطشان!

آدَم وُحَوَّا..
مين لـَوَّن دربهن ؟
لولا حبيبي..
ضيعوا البيبان!

شكراً حبيبي..

إنك بوَسط الحرب
وصلتني للرب ..
اشكيلو الزمان!

عِلَّمْتني إنُّو الوطن..
هو الدِّني
ولَوْما الأهل..
ما كانت الأوطان !
** **
دمشق فردوس النجار