إبداعات بقلم الشاعر / عادل أبو زيد

حبيب واتساب
برغم انه عشقها بجد
وكان عشقه يفوق الحد
صحيح هي ماجاوبتهوش
وقالت آه
ولا مالت معاه ف هواه
ولا راحت ف سكة صد
دي واحده خالية م الأحاسيس
وأكبر حاجة تعملها
لايك ع الفيس
و ههه على واتساب
وهو كان
حبيب واتساب
وهو اللي كسب روحه
وقال قاعد ينوح
و يعدّ في جروحه
ويبكي قال عشان سابت
ياراجل عيب على شنبك
يقولوا دي الرجال خابت
فبطّل تشتري ود اللي
راح بايع
وانشف حبه ليقولوا
عليك مايع
ياريتك كنت واد صايع
وتفهم انها ماكانتش
فيك هايمة
ولا حلمتش بيك
صاحية ولا نايمة
دي كات حاسباك
مابين المعجبين
هامش في ديل قايمة
واياك تاني تتراجع
ببوست عتاب
واياك تفتح الابواب
تغير حالة الواتساب
وتكتب كان
حبيب واتساب
مستر عادل أبو زيد