همسة
هات قلمك وكراسة رسم
ارسم ورده تكون دبلانه
و ارسم ضحكه تكون بهتانه
و فى نص الضحكه اكتب اسمك
اكتب نفسيتى تعبانه
متبنج جدا مش حاسس
ولا عارف آخرتى بأمانه
ارسم قلب بيحضن قلب
و ارسم إيد بتفارق إيد
ارسم بيت عايزين نوصله لكنه بعيد
ارسم اول حب تقابله
ارسم صوره فى عز المطره
فيها اتنين بالصدفه اتقابلو
ارسم جرح قديم متخيط
ارسم طفل جميل بيعيط
ارسم وش ملامحه عجوزه لكنه شباب
و ارسم باب مقفول ع الأخر
و ارسم قلب و شال اوجاع
ارسم شله و ناس و صحاب مبقوش حلوين
ارسم دمعه و رافضه تجف بقالها سنين
ارسم عمر لازال بيضيع على شىء مجهول
و ارسم حلم بقاله كتير على قطر وصول
ارسم وكسه و حسره كبيره
ارسم لمه
ارسم عيله
و ارسم فرحه جميله بتهرب خلف السور
ارسم بيت كان زحمه لكنه صبح مهجور
ارسم قارب بقا بيميل من كتر الشيله
و ارسم حمل تقيل بيشيلو دراع مكسور
ارسم ضحكه خبيثه و زور
ارسم ضلمه فى عز النور
ارسم بلدى و ارضى البور
ارسم حلم
ارسم فكره
ارسم جيل مستنى الهجره
ارسم بكره بكل مشاكله
ارسم قلب و عقل فى روحك على طول مع بعض بيتشاكلو
ارسم وشك
و اضحك و انت بترسم شكله
ارسم كل كلام اتقالك لكن خانك
ارسم نفسك و انت بتجرى فى قلب مكانك
ارسم و اكتب اى كلام
و العن جامد فى الأيام
طلع غلك فى الكراسه
فرغ حزنك فى الكشكول
و اكتب فى الأخر بالاحمر
" انا بضحك لكن مكسور
نجوى محمد
ليست هناك تعليقات:
إرسال تعليق