هات قلمك وكراسة.... بقلم الأديبة والشاعرة الرقيقة / نجوى محمد

هات قلمك وكراسة....
وارسم
ارسم وردة تكون دبلانه
وارسم ضحكه تكون بهتانه
وفي نص الضحكه اكتب اسمك
اكتب نفسيتي تعبانه
متبنج جداا مش حاسس ولا عارف آخرتي بأمانه
ارسم قلب بيحضن قلب
ارسم ايد بتفارق ايد
ارسم بيت عايزين نوصله لكنه بعيد
ارسم اول حب تقابله
ارسم صورة في عز المطر فيها اتنين بالصدفه اتقابلوا
ارسم جرح قديم متخيط
ارسم طفل جميل بيعيط
وارسم وش ملامحه عجوزة لكنه شباب
ارسم باب مقفول على الآخر
ارسم قلب شال اوجاع من الصنف الفاخر
ارسم شله وناس وصحاب مابقوش حلوين
ارسم دمعه رافضه تجف بقالها سنين
ارسم عمر لازال بيضيع علي شئ مجهول
ارسم حلم بقالو سنين علي قطر وصول
ارسم وكسه وحسرة كبيرة
ارسم لمة
ارسم عيله
وارسم فرحة جميله بتهرب خلف السور
ارسم بيت كان زحمة لكنه اصبح مهجور
ارسم قارب بقي بيميل من كتر الشيله
ارسم حمل تقيل بيشيله دراع مكسور
ارسم ضحكه خبيثه وزور
وارسم ضلمة في عز النور
ارسم بلدي في ارض البور
ارسم حلم
ارسم فكرة
ارسم جيل مستني الهجرة
ارسم بكرة بكل مشاكله
ارسم قلب وعقل في روحك علي طول مع بعض بيتشاكلوا
ارسم وشك واضحك وانت بترسم شكلك
ارسم كل كلام اتقالك لكنه خانك
ارسم نفسك وانتي بتجري في قلب مكانك
ارسم واكتب اي كلام
طلع غلك في الكراسه
فرغ كبتك في الكشكول
واكتب في الاخر بالاحمر
انا بضحك لكن مكسور....

نجوي محمد