من إبداعات الشاعر الراقي / علاء حجازي

قوليلي حكايتى يامرايه..
وليه مابقاش فى ضحكايه..
ودنيا الخوف بقى فيها..
بيقتل أحلى مافيها..
وناس تقلب كما الموجات..
وعايشه حياتها كلها هات..
ولو مره لاقوك مبسوط..
ينادوا عليك بعلو الصوت..
فرحان ليه يافندينا..
كأن الفرحه مش لينا..
وأتارى الفرح حلم وراح..
وأنا عمرى ياناس مارتاح..
مادام العمر كله جراح..
مافيش مركب ترسينا..
على رصيف بدون مينا..
تعرفنا تهدينا..
وترجع تانى تحيينا..
ولا العمر عدى خلاص..
وجايه الناس تعزينا..
يافرحه ليه بس العناد..
وجايه ليه من غير ميعاد..
طولتى ليه بيننا البعاد.
وكمان جايه بدموع حزينه..
وأنا اللى كنت فاكرها زينه..
أتارينى راجع للعذاب..
أقفل ف صفحه تفتح كتاب..
يادنيا حلمك عليا حبه..
مجروح وجرحى ماله أطبه..
واللى جرحنى بيعزى فيه..
وكأنه مشهد من مسرحيه..
ماقبلش منى حتى العتاب..
وسألته قال ماعنده جواب..
حلمى معاه أصبح سراب..
ورضيت أنا رغم العذاب..
(مسرحيه)
علاء حجازى