الأربعاء، 10 يونيو 2020

من إبداعات الأديبة والشاعرة الراقية / نجوى محمد

مين اللى قال إن الكبار
ما بيضعفوش
ما بيحتاجوش
مين اللى قال إن المشاعر عندهم 
حبة رتوش 
مين اللى قال إن القلوب
بالوقت تتحول صخور
بالعكس دى بتصبح أرق
و معتقة زى العطور
و قادره تطرح بالأمل
و تطير لفوق زى الطيور
جواها حب و نور و خير
بيكبروا .. ما بيصغروش
انا شعرى ابيض ؟ آه صحيح
لكنى جوايا إحتياج
اللى فى سنك ما يشوفوش
ما يحسهوش
على قد خبرات السنين
قادر أبان جامد .. رزين
لكنى جوايا حنين
و حاجات كتيره مع السنين
ما بيموتوش
جوايا حد حاجات بسيطه تفرحه
جوايا عاشق الخيانه بتجرحه
جوايا طفل حضن امه بيوحشه
فى حد فينا الحنان ما بيوحشوش ؟؟
اياك تفكر أن عمرك انتهى
و حاجات كتير ما تقولش ده مش وقتها
فى بكره جاى ؟
فيك قلب حى ؟
عيشوا و حبوا و ارقصوا
ما تتكسفوش
Nagwa Mohamed
في

ليست هناك تعليقات:

إرسال تعليق

الاشتراك في: تعليقات الرسالة (Atom)

قلبي يحادثني قلم الاديبة الشاعرة/ ايمان زقزوق

  قلبي يحادثني قلبي يحادثني بأشياء وما غبت عني إلا لأسباب قد شغلتك عني أوصفها فتغزلت في جمالها ألا تعلم أني شاعرة ولحروف الكلام مترجمه ليس...