من إبداعات الشاعر الرائع / أحمد الخياط

زاد الحمل وتعب القلب
وشمس العمر خلاص حتغيب
شايلين روحنا معاها جروحنا
وفرحة وحزن وصبر رهيب
وحلم يعدي يبات في ضلوعنا
ويكبر فينا كمان ويشيب
وعشان تكمل باقي الرحلة
وتكون رحلة بدون تعذيب
لازم يرمي القلب حموله
يمكن جرح القلب يطيب
لازم يمسح صورة وذكرى
ويمحي في قلبه اسم حبيب
ويمسح كلمة لهفة وشوق
وحب ووهم لذيذ وعجيب
ويفتح صفحة جديدة في عمره
ويرجع تاني كأنه غريب
وينسى كمان الماضي بحاله
ويعيش بكرة بدون ترتيب
لازم يبدأ عمر جديد
عمر سعيد .. مش عمر كئيب
لازم يرمي القلب حموله
أو يتخلص م الكراكيب