من إبداعات الأديبة والشاعرة الأنيقة / نجوى محمد

أنا عاشقة قلوب عاشقة ..
قلوب الغير !

وعقلى معاد مستحمل ..
من التفكير !
وكل ما أنوى أتغير ..
قلبى بيرفض التغير !
وقالوا :
لو صبرتى تنولي ..
وانا صابرة بقالى كتير ..
ومستنية ..
خلاص القلب داب منى !
ومهما أبكى واتعذب
ولا بيحسوا يوم بيا
وبأديهم بلاقى الروح
يوماتى بتدّبِح فيا
زرعت العُمر ف ايديهم
حصدت الدمع ف عنيا !
وانا جايالك وبدعيلك وانا طمعانة ..
تقوينى
وتربط ع الفؤاد والروح وف الاحزان ..
تواسينى
والاقى قربى ليك أصبح مكفينى
واحس ب راحة ف رحابك تنسينى ..
جميع الناس !
يارب الناس !
دعيتك والدموع سابقة الكلام والنطق
يا خالق ياللى بتقَلّب قلوب الخلق
بحق رسولك المبعوث يخرجنا ..
من الظلمات لنور الحق
تخَرَّج حبه منى .. بدون م القلب لحظتها يبطل دق !
نجوى محمد