أنا الشاعر أنا الخياط بقلم الشاعر / أحمد الخياط

أنا الشاعر
أنا الخياط
وباخد دمعتى بالباط
أنا التايه ووسط الناس
أنا الشاعر بدون كراس
يساع حضنى لكل الناس
وحضن الناس عديم الشوف
بيحضن جزمة الحراس وينسانى

أنا الشاعر
كما المحروم دفا عياله
مشيت أطوى دموعى طى
كما المحروم من البسمه
وفارد شفته للضى
بلبّس حزنى توب تانى
وابيع مراجيح معاندانى
يعود الحزن من تانى
يقول بتوحشك ياخى

أنا المحروم من السكه
وخطوى على الرمال حران
أشاور للطريق يفتح
واحرم نفسى من زادى وأنا الفرّان
واطرطق ودنى لم سامع
لحد من الموالى أدان

وأرجع تانى من تانى
أبيع مراجيح معاندانى
الاقى السكه واخدانى
لطريق رايح مهواش جاى
وادور تانى ع العنوان
أنا الشاعر
الخياط