المشهد الاخير ( واقع حزين _ رثاء ) بقلم الشاعر الرائع / عادل أبو زيد

المشهد الاخير ( واقع حزين _ رثاء )

مفيش لحظات
يادوبك رنّ على والده
وبعدين مات
ولا قال له
سلام يابا
ولا طلب المدد
والعون
رحل ف سكون
وساب لأبوه
سؤال مجنون
مقالّيش إيه؟؟؟؟؟

المشهد الأول

كان الولد
أول صبي
اسمه على
سبط النبي
ما أجمل
الوجه البريئ
كات ضحكته
تنوّر طريق
كان هوّه
جايزة عمرهم
كان كل شيء
الضحكة ساحرة
تشفي قلب عليل
وارث من الأب الجليل
حنّيّته
والبسمة مافارقتش
أبدا شفّته
بسمه بتخفي كل
أحزان دنيته
كان شمس لمّا بتيجي
يرحل ألف ليل
يا طمي نيل
فضلك علينا كلنا
الدمع ده مش دمعنا
الدمع ع الراحلين
وانت ف وسطنا
سايب اطار الصورة
ساكن قلبنا
بس العيون
مشتاقة ليك
وكمان سنه
فاتت عليك
واحشانا ضحكة
نور عنيك
واحشانا موت
نايم في احضان السكوت
بنحايل الايام عشان
يمكن تفوت
يا احلى صورة
وأحلى صوت
ياللي السنين المُرّه
بنحلّيها بيك
وكمان سنه فاتت عليك
عادل أبو زيد